Alonso dhe Hamilton: Të jemi sa më afër Ferrarit

Alonso dhe Hamilton: Të jemi sa më afër Ferrarit

--------------------------------------------------------------------------------

Alonso dhe Hamilton: Të jemi sa më afër Ferrarit
Diferenca me Ferrarin ekziston, pasi këtë gjë e tregoi qartë edhe gara e parë të këtij sezoni në Australi, megjithatë Fernando Alonso dhe McLaren shpresojnë që në këtë fundjavë të minimizojnë sa më shumë këtë diferencë në Sepang. Kampioni i botës, garën e parë e përfundoi në vendin e dytë, pas Kimi Raikkonenit, një rezultat që mund të konsiderohet shumë i mirë.

"Në Australi e filluam mirë kampionatin botëror. Ne e dinim që nuk do të ishim aq të shpejtë sa Ferrari, megjithatë vendi i dytë mund të konsiderohet një rezultat shumë i mirë. Në pjesën e parë të sezonit është shumë e rëndësishme t'i përfundosh të gjitha garat dhe të grumbullosh sa më shumë pikë. Gjatë kësaj periudhe duhet gjithsesi të vazhdojnë programet e përmirësimit të makinës. Skuadra është duke punuar shumë për të zvogëluar diferencën që kemi me rivalët tanë", tha Spanjolli i cili në sezonin e kaluar është renditur në vendin e dytë në këtë garë, ndërkohë që në vitin 2005 arriti ta fitonte çmimin e Madh të Malajzisë. "Pista e Sepangut është shumë teknike dhe makina duhet të përshtatet në të gjithë sektorët. Të gjitha kthesat janë të shpejta dhe duhet një makinë që ka një balancim të mirë dhe të ketë një aerodinamikë perfektë. Gjithmonë jam paraqitur mirë në Sepang dhe në vitin 2005 kam arritur të fitoj, ndërkohë që në sezonin e kaluar u rendita i dyti. Duke u nisur nga këto fakte, mund të them se kam kujtime shumë të mira nga kjo pistë. Është një garë shumë e vështirë nga ana fizike, për vozitësin dhe për të gjithë skuadrën. Padyshim po kaq e vështirë mund të konsiderohet kjo garë edhe sa i përket makinës. Ne jemi të gatshëm për të zvogëluar diferencën e madhe që kishim në garën e parë të këtij sezoni kundër Ferrarit. Pres me padurim që t'u rikthehem garave," ka deklaruar kampioni i botës në fu*** Fernando Alonso.

Në garën e Melburnit, debutuesi i skuadrës McLaren, Lewis Hamilton, ka shkëlqyer me një paraqitje shumë të mirë. Që në garën e parë në Formulën 1 ai arriti të ngjitej në podium. Në testimet e javës së kaluar në Sepang, anglezi ishte ndër më të shpejtit. "Sepangu është një pistë shumë e shpejtë. Ato katër ditë prova që zhvillova, më ndihmuan shumë. Provuam shumë pjesë të reja që do t'i kemi në makinën tonë për këtë garë. Objektivi ynë padyshim është që të zvogëlojmë deri në maksimum diferencën që kemi me Ferrarin. Jam i sigurt se të dielën do të japim më të mirën," përfundoi Hamiltoni.